قصيدة مالك يا ست الكل

هى رسالة شهيد شهداء من نجع حمادى لأمه الحزينة
،أُلقيت فى وقفة الشموع بالكاتدرائية المرقسية 20/1/2010 والتى نظمها موقع صوت المسيحى الحر بالتعاون مع موقع الأقباط الأحرار.


رساله من واحد من شهداء نجع حمادى إلى أمه الحزينه

صوت نقى جداً بخلفيه موسيقيه


{ قصيدة مالك ياست الكل }

{ من شريط أوبريت سيبنى أعيش }


قصيدة
مالك يا ست الكل
كلمات الشاعر : رمزى بشاره
موسيقى : م. جورج رمزى
تسجيل : م . جرجس صبحى
تم التسجيل فى إستوديو مارسلينو بشبرا


كلمات القصيدة

مالِك يا سِت الكُل دَمعِك عالخُدُود
ماتقَوِّى قَلبِك دَه إنتى أدَّها وأدُود
مالِك يا سِت الكُل دَمعِك عالخُدُود
ماتشدى حيلك ده انتى ادها وادود
عايزِك تِحِسِّى بتَعزِيَه ... وإنسى الحاجات المُؤذِيَه
وإفتِكرى دايماً يا غاليه رَبِّنا مَوجُود
ماتدَمَّعيش وبلاش يا أُمِّى تعَيَّطى
يُوم الأربعين رُوحى الكنيسَه وزَغَرطى
وِخَيَطى يا أمَّه القَميص إللى إتقَطع
لَمَّا دَخَل فيه الرُّصاص
لَو دَمِّى كان عامِل بُقَع
إبقِى إغسِلِيه بحَبِّة بطاس
وِنَضَّفِيه يا آمَّه خلاص من كل بَقَع الدَّم
وَرِّينى ضِحكِتِك الجَميلَه. بَلاش تِشيلى الهَم
إزَّاى يا أُمِّى تكَشَّرى وأنا فـ هَنا وِسَعيد
طَب تِعرَفى عَند المسيح أنا إتحَسَبت شَهيد
مش هُمَّ قَتلونى وَأنا مصَلِّى صَلاة العِيد
وِعَلَىَّ لِبس جديد وفـ جُوفى قَلب جديد
طَب تِعرَفى لَمَّا أفتِكِر وأستَرجِع الأحداث
باأحِس إنى طِلعت فوق عَند المَسيح
وَيَّا ملاك الذَّبيحه فـ آخر القُدَّاس
بِتقولى إيه ؟
قَتلونى من غير لا جريمه وَلا سَبب ؟
شامِم يا أُمِّى فـ لَهجِتِك رِيحِة غَضب
بلاش غَضب
ده إنتى عَلِّمتينى قلبى يبقَى أبيَض
زَى قَلب عُود قَصَب
آه صَحيح عَملتوا إيه فـ عيد الغِطاس
خَلَّصتُوا كام لِبشِة قَصَب وطَعمُه إيه القُلقاس ؟
مالِك كِده بتتنَهدى ؟
إيَّاك ماكانشى ليكى نِفس تعَيِّدى!
لأ عَيِّدى
وإفتِكرى إن إبنِك شَهيد
...
وماتخافيش
أنا مش رخيص
ودمِّى مش هيروح فطيس
بس خَلِّى الأمر ده على ربِّنا
ما إحنا أولاد الملك
ولأننا ولاد الملك ما بنِنتِقِمشى لنَفسِنا
أنا بَس عايز آقول لُكوا
إنِّى بِجَد باأحِبُّكوا
وِلو حقيقى وَحَشتُكوا
تَبِّتُوا فى إيدين يسُوع
وِكفايه فى الأرض إتحَرَمت مِن حَنانكوا وحُضنُكوا
بلاش تروحوا حتَّه تانيه . وأبقى شايفكم وتشُوفونى
وشىء حايشنى عَنُّكوا
ماأقدَرش آجيلكُم أو تِجولى لا تِوصَلوا لى وَلا أنا هاأوصَل لُكوا
تَبِّتُوا فى إيدين يَسُوع
ماتخلونيش هنا فى السما أفَضَل أعيش وأنا بَردُه مَحرُوم مِنُّكوا
باحِبُّكم باأحبُّكوا
كلمات الشَّاعر رمزى بشاره





https://www.youtube.com/watch?v=qTxQ12q1s2M

صلولى كتير علي العياط اللي هتعيطوه بعد القصيده دى انا بشرط تصلولى مش تدعوا عليا

مرمر