دم شهداء المسيحين

صرخت بلدي باعلي صوت —– لازم ادافع عن ديني
ازاي ف بلاد الغرب الكافرة — يقتلوا مروة الشربيني
عين بعين وسن بسن ——— ولازم انا حقي يجيني
كلنا ايد واحدة ويللا ——– ندافع عن اسمي وديني
+++++++++++
راحوا يدافعوا بحزم وقوة — – وزير ونقيب المحامين
بس ياتري دمك يامروة —- هيساوي دم المسيحيين
مسيحيين كانوا صايمين —— متناولين وفرحانين
قابلوهم علي باب كنيستهم —- وباسلاح متربصين
وبدل مايصبحوا علي عيدهم – صبحوا ياعيني مقتولين
+++++++++++++
ايه رايك ف لون الدم – ياضمير كل شخص ف بلدي
ايه رايك ف ام بيشوي – وهي بتصرخ وتقول ولدي
قتلوك يابني وماليش غيرك— اخدوك مني يا سندي
قتلوك يا ضنايا وانت بريء—قتلوك في العيد يا كبدي
++++++++++++++
قتلوك وانت ابن العشرين— وانا لسا مافرحتش بيك
قتلوك اكمنك علي دين –– رافضين انه يكون ليك
رافضين انه يكون ف بلادي- ارفع صوتي واتلو صلاتي
رافضين انه يكونلي الحق – بعد مماتك اصلي عليك
+++++++++++++
قالوا كتير احداث فردية—قالوا معتوه قالوا مجنون
ومن الكشح لاسكندرية –صوت مرفوع وسيف مسنون
وعلشان منعوا مآذن برة – قامت قومة ميت مليون
لكن هنا في الدولة الحرة—مالناش حق مافيش قانون
ادبح واحرق في الاقباط –اقتل دة جهاد مضمون
احرق كل مكان يتقال – فيه كلمة كرياليسون
++++++++++++
ارحمنا يارب مالينا سواك – ارحمنا يارب بنستناك
ارحمنا يارب احنا ولادك—ارحمنا عايشين ف حماك
ارحمنا ف كل وقت وعصر
باركنا كقولك ((مبارك شعبي مصر))

صلولى كتير
مرمر